Tuesday, May 05, 2009

MyUpdate 23

MyUpdate 6-23 (March ‘08-April ‘09)
30th April 2009

In mi hriatrengna avangin lawmthu ka han sawi nawn hmasa leh duh a. Israel fate Pathian a hruai ang khan Pathian hian nitinin min hruai thin a, a chang chuan hnaite ah a inlan a a chang chuan a hmel a thukru thin. Hagari leh Ishmaela Beer-seba thlalerah beiseina nei tawh lovin thih nghakin an awm a, Pathian vantirkohvin Hagari hnenah Pathianin naupang aw a hria a, chi ropui taka a siam tur thu a hrilh a. Pathianin Hagari mit a tihvar sak a tui awmna hmun a a hruai ta a. Mihring lamah chuan beidawnna khur thuk taka kan awm lai pawhin Pathian chuan min hre reng a, kan laka a thutiamah hian a ding reng thin a, chu mi tih hlawhtling tur chuan min hruai thin a ni.

Kolossa 1:16-17 ah chuan ti hian ziak a ni: “amahah chuan engkim siam a ni a, vana awmte, lei a awmte nen, hmuh theihte, hmuh theihlohte nen, lalthutphahte pwh, rorelnate pawh, lalnate pawh, thuneihnate pawh; engkim a siam a ni; tin, ani (Isua) hi chu engkim awm hmain a awm reng a ni, amahah chuan engkim a ding ho (amahah chuan engkim a betkhawm vek) bawk a ni.” He mi chang atang hian kan nuna thil thleng hi Isua ah chuan a in zawmkhawm vek a ni, harsatna te pawh lawmna te pawh tih a chiang hle in ka hria. Engmah hi Pathian hriatlovin a thleng lova, Pathian hian a ropui nan a hmang duh thin a ni. Pathian hnathawh ka hmuh te kan han tarlang leh dawn ange.

Kross thiltihtheihna
Lal Isua thihna Krossah chuan kan sualte ngaihdam a ni a, kan zahna te lak bo a ani a, kan lungaihna te lawmna in thlakthleng a ni a, kan natna, rilru leh taksa, te tihdam a ni thin. He Kross thiltihtheihna hi kan chhungkua hian kan chang nasa hle. March thla tir khan ka pa cancer natna in a tihbuai mek chu Mumbai a check-up in a kal a, chuta chuan Doctor ten PET scan an tihah chuan cancer hrik an hmuh loh thu min hrilh a. Pathian hnathawh ropui tak avangin ka lawm a, ka pa hian Pathian tihdamna a chang a ni tih ka hria. Ka nu pawh a dam chho zel bawk a, hei hian ka rilru hahna te pawh min chhawk nasa hle. Mi tam takin min tawngtaisak thin tih ka hria a chuvang chuan han tarlan hi tha ka ti a ni.

Thihna leh Thawhlehna awmzia classroomah
Kan sawi tawh thin angin Good Friday leh Easter hma kar chho hi kan tan chuan kar pawimawh tak a ni thin a. Khawvel hmun hrang hrangah ‘Kut’ pawimawh tak a nih avangin Sawrkar pawisawi si lova Kross awmzia duhtawk a kan sawi theih hun a ni. Keipawh ka theih angin tan ka la ve leh a, class tam zawkah chuan ka duhtawkin Isua thihna leh thawhlehna awmzia, ringtu te tana a awm zia te, ka nun ti danglamtu a nih zia te ka sawi thei a ka lawm hle a. Zirlaite pawhin hriatnuam an tih hmel viauin ka hria a, ka lawm hle. Engtinge an nunah thu a sawi ang erawh ka hre zui lova, amaherawh chu kha lam chu Pathian thawh zawmah ka dah a, ka tihtur ni a ka hriatchin erawh ti thei a ka awm ka lawm hle.

Isua leh a zirtirte chanchin min hrilh thei em?
Good Friday leh Easter kan hmang zova a kar leh class lesson pangaiin ka kal pui leh a. Tichuan, Nilaini zing a ka class hmasa berah chuan dar a rik veleh hian ka student pakhat Sandy chuan, “Puii thil zawh lawk che ka duh a min pui thei ang em?” ti hian min rawn bia a. Keichuan, “Aw engtinge ka puih theih ang che?” tiin ka lo zawt vat a. A zirlaiah harsatna a nei a maw ka ti a, mahse, “Isua leh a zirtirte chanchin hi min hrilh thei angem?” tih zawhna minzawt chu ka rinloh leh ka beisei loh daih mai anih avangin keipawh ka phu deuh zawk a. “E, I duh phawt chuan ka hrilh dawn che nia, chhunah chaw kan ei dun anga chuan ka inah kan phei anga kan ti ti dawn nia” tiin ka thlah a.

Sandy hi an class ah chuan a English structure a tha ber pawl niin ka hria a, ka rilru chu a nui var var a. Pathian hian zirlai kan hma a a rawn dahte hi a tlangpuiin a thiam pawl a ni deuh zel hi a mak ka ti thin. Chuvang chuan ka rilru a lawm hle bawk. Tichuan, chhunchaw kan ei zawh chuan ka inah kan hawng phei a, a hriat duh ang te kan sawi a. Pathian Lehkhabu an mahni tawng leh saptawng inkawp chu ka pe a. “Hei hi lo chhiar la Isua chanchin chu a inziak vek a, zawhna I neih apiang ziak thla la kan zir dun dawn nia” tiin ka thlah ta a. Zirlai exam in a chhunzawm mai avangin hmuh lehna hun ka la nei lova, ka hmuh theih veleh chuan mumal taka ti tina hun kan neih theih ngei beiseiin ka tawngtai sak thin.

Pathian rin ngaihna ka hre lo
Nikum semester kan tan tirh deuh khan zirtirtu thar kan nei a, a hming chu Maggie a nia. Londonah kum nga lai lehkhazir leh hnathawkin a awm tawh a. Tunlai Chainis chhungkuaah chuan fa pakhat chauh nei an nih tlangpui avangin a ni pawh hi fanu mal a ni a. Tichuan, kan department a rawn awm tirh chuan Foreign Teacher ka nih angin inhmelhriatna te kan nei a. Chaina rama hun engemaw chen awm lo a nih avangin mahni ram mah ni se nuam a ti lova, thian pawh a nei vak lova. Hemi vang pawh hian a ni mai thei min ngaina ang reng phian a. Lunch te kan ei ho a kan chhuak dun ve zeuh zeuh thin a. Hetia kan chhuah dun tawh hi chuan ti ti chi hrang hrang kan vawrh ve thin a. Kan rinna (faith) chungchang te pawh kan sawi chhuah chang a awm thin. Kan inhmuh tantirh deuhva a thil sawi chuan ka rilru a khawih em a vangin Pathian hnenah “Lalpa Maggie I hi I hnenah ka hruai theihnan min pui rawh” tiin Pathian ka dil a.

Chaina ram hi Pathian a awm lo tih a in zirtir ram a ni tih kan hriat theuh angin Maggie pawh hi hetiang anga hrual chhoh a ni. “London a ka awm lai pawhin Ringtu inkhawmnaah te, Pathianthu an zir honaah te ka kal ve reng thin mahse Pathian hi ka ring thei thlawt lo a ni” tiin min hrilh. Engtinge Pathian hi ka hmelhriattir theih ang aw… ti rilru rengin ka kawm thin a. Semester thumna kan kai chhoh chuan kan innel viau ta a, tichuan May ni 14 chhunah ka inah chaw kan ei duna chutah chuan Louie Giglio thusawi “Indescribable” , arsi lam zir mi ten a science hmanga kan awmna lei lung leh a pawn lama arsi an zirna a an thil hmuhchhuah hmanga Pathian ropui zia leh sawifiah zawh sen rual a nih loh zia a sawina a ni a. Engtinge Pathianin hna a thawh dan tur erawh chu ngaihtuah thiam lo chungin bang lovin ka tawngtaisak zui ta char char a. A karleh ni May 19 ah chuan ka tawngtaina rah hriat ka duh avangin lunch eipuiah ka sawm leh a. Amah chuan kan Pathianthu ngaihthlak chungchang chu a rawn sawi chhuak ta a. “Puii, Pathian tan hian thliarkarte hi lei nawi te tak te ang lek a nih chuan engtinge a nihna chiang taka a hriat theih?(Isaia 40:15 NIV)) , tiin min zawt ta a. Ka thinlungin lawmthu ka sawi nghal mawlh mawlh a. Heti hian ka chhang ta a, “Engkim hi a siam a nih avangin a hre vek a lawm” tiin. “I duh chuan kha pa thusawi tho “How great is Our God” tih kha kan en dun leh dawn nia ka ti a, a ni pawh chuan tha a ti a, remchang hmasa bera inhmu leh turin kan inthen a. (Louie Giglio thusawi pahnihna hian kan taksa "cell" a protein pawimawh ber mai pakhat chu "Laminin" a nih thu leh a pianzia chu kross ang chiah a nih thu a tarlang a. Kan taksa phuarkhawmtu pawimawh ber mai kross pianzia a nih ang hian Kross hian khawvel a thil awmzawng zawng a phuarkhawm zia a sawifiah.)

Pathianin hun tha tak min siamsak lehin May 28 chhunah Maggie lunch eiin ka inah a rawn kal leh a. Kan harsatna te inhrilh tawnin hlim takin hun kan hmang a, chaw te kan ei khamah Pathian thu chu kan ngaithla duh leh ta a. Ka thahnemngai lutuk hian ka nawr nasa lutuk anga a hel ang tih ka hlauh avangin kan thil en chu ka comment duh miah lova, chuan movie dang kan en zawm a. Maggie lo kal hma hian “The Purpose Driven Life” Rick Warren a lehkhabu kha zir nawn leh ka duh avangin ka bih a. Ka thinlungah hian Maggie hi zirpui theih ka chak khawp mai a, Pathian hnenah ka dil a. A lo len lai chuan chumi lehkhabu in a a thil tum vel chungchang chu ka hrilhfiah a, mahse zirpuiah chuan ka sawm ngam chiah si lova. A haw tur chu ka thlah ang che ka ti a kan chhuak dun a, thil hrang hrang kan sawi a, a tawpah chuan, “Maggie ka lehkhabu hmuh che kha zir ka duh a min zirpui duh em?” tiin ka zawt ta a. “E! a that hlauh chu Kristianna lampang lehkhabu zir ka lo tum lai tak a nia, Koran pawh ka chhiar tawh lo a harsa ka ti lutuk a” tiin min chhang ta chu ka thinlung hi a HALLELUI pawp a ni. A remchang hmasa bera zir tan turin rem kan siam ta a ni.

Tuna ruahmanna ka neihah hian Pathianin engtinge hna a thawh dawn ka hre lo, nimahsela thlaraubo te chhanchhuah a an awm hi a lawmzawng a nih avangin Amah vek hian a duhzawng chu a ti hlawhtling ngei dawn a ni tih ka hria…rinna in.

Lalpa chu fakin awm rawh se.

Wednesday, April 15, 2009

MyUpdate 22

MyUpdate 6-21 (December ‘08-January ‘09)
13th April 2009

Ka mail hmasa a ka chanchin ka ziah kha kan han chhunzawm leh dawn anga, chhiar a ninawm deuh a nih pawhin min lo hrethiam dawn nia. Ka laka Pathian thatna hi a nasa em a han upbo pui mai chi a niin ka hre lova chuvang chuan ka theih velah ka han ziak zel a ni e.

Jehovah Jire (Pathian chuan a hmu reng a a mite mamawh a pe thin)
Rilru hnual tak leh a chang chuan mangang em em a ka awm lai te awm thin mahse Pathian chuan min thlir reng a, ka mamawh te min pe leh thin a. December thla tir khan Sydney khawpui Epping kohhran thalai rual ten kan rawngbawlna te chhim turin min rawn thlawh a. Kan class ah te min rawn puiin naupang hote nen hun tha tak an rawn hmang a. December thlaah ka piancham a nih avangin an awm remchan lai tiin an thianza ho 12 leh ka nau ringtu te paruk chu ka inah ka sawm khawm a. Ka naute zinga pakhat Aron a nen kan piancham a inan avangin ka lawm sak nghal bawk a. Cake te kan zai a hlim takin kan hmang hova. Tin, hemi zan hi a remchan em avangin ka naute ho chu Pathian an lo rin chhoh dan leh tawngtaipui an ngaihna te sawina hun kan hawng a. An mahni chauh lo kan Australian thiante nen chuan kan vaiin Pathian kan tawh dan kan sawi ta vel hlawm a. A tawp berah chuan a in neitu ka nih angin ka sawi ve a.

Hetih hun lai hi keima nun hrim hrim pawh a chauh em em lai leh ka rilru a hnual em em lai a ni a. Tichuan, Pathian ka tawh dan atanga ka nun pumpui ka hlan chhoh dan te ka sawi a. A tawpah chuan in lamah ka nu leh pa damlohna avang te leh ka pu damlohna avanga hawn ka chak zia leh mahse ka tan hawn mai mai a awlsam loh zia te ka sawi a. He mi zan hian Thlarau Thianghlimin kan zavai hian min khawih nasa em em mai a, mipa ho pawh an pachang thei bik lo, mittui nen kan in hnit hlawp hlawp vek a. Ka ngaihtuah let leh thin pawh hian ka piancham ka lawmah chuan a la ropui ber hialin ka hria.

Tichuan, kan Australian thiante chu hemi kar Nilai thawhtan a hawng tur an nih avangin Nilai zanah chaw eiin kan chhuak hova. Ka beisei phak loh thil ropui tak mai ka tan an lo buatsaih reng mai a. Ka chanchin an ngaihthlak atang khan India ram a ka chhungte ka tlawh theih nan tiin pawisa an lo thawh khawm a, chu chu min han pe chu sawi tur reng reng ka hre lo. Ka thinlungah chuan “Lalpa I van tha em, ka mamawhte I hai si lova, min van thlahthlam lo em” tih bak hi ka sawi thei lo.

Christmas vuakvel
Kum danga ka tih thin angin Christmas awmzia class roomah tha takin ka sawi leh thei a ka lawm hle. Pathianin a naupangte thinlungah entinge hna a thawh erawh chu Ama kutah ka dah a, a chanchin puangchhuak thei a ka awm avang erawh chuan ka lawm hle. Kum dang a naupangte sawm khawm a chawei ka siamsak ang thin kha ti lovin, a mal te te in chaweiah ka sawm hlawm a. A mal te te a ti ti na hun tha tak ka neih pui thei a ka lawm hle.

Passport-Visa buaipui
January thla tir khan ka Passport lamin Beijing a vawihnih na atan ka han kal leh a. Ka Visa (Chaina rama awmphalna) hi February 14 a thi tur a nih avangin a tepter hle tawh a. Tin, January ni 13, 2008 ni kha ka hawn hun tur ni a ni a. Ka tan Visa thar siam fel sa thlap a hawn a that avangin buaipui tha ka ti si a. Kan Waiban (Foreign Affairs Office) ka dawr a an ni chuan, “I hmu thei lo mai thei a ni, Expert Card siamtu office an muang lutuk a kan lehkha dah hmasak pawh kar hnih a tang tawh” tiin min lo hrilh a. Ka rilru chuan, “Pathianin ka hawnna tur pawisa min pe tawh a Visa ah chuan ka buai dawn lo hrim hrim” ti rilru chungin kan hotute hnenah chuan, “Nidangah pawh harsa tak chung pawhin min siam fel sak tawh a, tun tum ah pawh ka ring tawk che u” ka ti a. Tichuan, kar khat chiah a awm tih chuan ka Visa chu min buaipui sak ta a. Tlai ngai lo Pathian chuan a rinawm zia min hmuh tir leh in ka hawn ni tur January ni 13 dar 11 ah Public Security Bureau atang chuan ka Passport thar chu ka va lam a, dar hnih ah airport panin haw turin ka chhuak nghal.

Chhungte nen dam takin India ramah
Tluang takin ni February ni 14 khan ka chhungte nen hlim takin kan inhmu khawm a. Tun tum a ka haw hi damloh tlawh tur te mithi ral tur te in Pathian in min hruai hawng a ni deuh ber mai a. Ka rilru a min pawt hawng tu ber mai ka chhungte, ka laina leh thiante, natna in a bual te thihna lusunna avanga rum te tlawh kualna hun tha tak mai ka nei thei a ka lawm hle a. Pathian in min hruai dan mak tak tak mai ziah chhuah sen rual a ni lo. Ka mamawh hun tak a Pathianin mi a rawn tirh dah te, a chang chuan lungawi lo taka ka kalna tura ka kal ngawng ngawng chang te a awm a mahse Pathian remruat fel tak chuan ka beisei lo danin hna a thawk leh thin. “Ka ngaituahte hi I ngaituahte a ni si lova, I awmdante chu ka awmdan a ni hek lo” Lalpan a ti…..

Ka rilru in a ruahhmanna ka siam ang a ka mi tlawh duhte thlawh thei a ka awm avangin ka lawm hle a. Tichuan, February 11 khan tluang takin Chaina ram, ka awmna chu ka thleng leh ta a. India rama ka cham chhungin ka hah deuh avangin ka thleng chhoh meuh chuan ka chau hle. Tichuan, class kal hma in chawlhna hun tha tak ka nei thei a ka lawm hle.

Monday, April 13, 2009

MyUpdate 21

MyUpdate 6-21 (October -November’08)
9th April 2009

Hun rei tak ka chanchin ziak lova ka awm avangin engtia han tan tur nge tih rei fe ka ngaihtuah a. Mihring hi thlarau a chauh hian tisa peng dang hnathawhte hi a khawih tel vek a lo ni a. Hun engemaw chen chau takin Isua hnung ka zui tauh tauh a, hemi chhung hian thil tam tak keima chung mai pawh ni kan chhungkaw chungah thil a thleng a. A chang chuan Pathian laka vui ngawih ngawihna ten min bual a, beidawng em em a awm chang te ka nei thin a ni. Heng zawng zawngah hian belh tur dang ka hriat loh avangin Pathian chu harsa ti chung chungin ka bel tang tang a. Ka hmuh ve theih china thim em em te chu zawi zawiin Pathianin min tih kian sak chho zel a. Tun tum ah hian thla engemaw ti chhunga ka chunga thil thleng thenkhatte han tarlan leh ka duh a, bang lova min tawngtai sak thintute chungah lawmthu ka han sawi leh mawlh mawlh e.

Buddhist ho puithuna
October ni 2 khan University hruaitute huaihawtin Qinghai Province khawpui ber Xining khua atanga Km 25 vel a hla ah Buddhist Monastery hmingthang tak Ta’er si, Kumbum Monastery an tih chu kan tlawh a. He monastery hi a hmingthan nachhan pakhat chu sakhaw inzirtirna hmunpui a nih bakah Tibet hmam hruaitupa D’Lama leh Panchen Lama seilenna hmun a ni. Hemi avang hian Tibet hnam tam takin kumtin an tlawh hum hum a, Chainis ho Buddha ringtu te pawh thlawhtu tam tak an awm reng bawk a ni.

He monastery hi Buddhist ho tan hmun pawimawh tak a ni a puithiam pawh kum 10 atang 80 inkar 600 vel lai an awm a. Tin, sakhaw puithuna avanga zin veivak (pilgrims) ho pawh an kat nuk nuk mai bawk a. He monastery ah hian Temple hrang hrang a awm a, Dharma Protector Temple tih te, Yak Butter Sculpture Temple te, Long Life Temple te, the Great Hall of Meditation tih te an ni hlawm a. Ka sawi duh ber leh ka suangtuahna tikal thuitu chu sakhaw puithuna avanga zin veivak te (pilgrims) kha an ni. Monastery chhungah khan ding leh bawkkhup hian an kal a, a thente chu ding-bawkkhup ringawtin an khua atangin kar khat dawn lai te he monastery pan hian an rawn kal hlawm a. Tin, temple an rawn thlen hnuah pawh nilengin temple hmaah vawi tam tak bawkkhup leh thingthi in an hun an hmang a. Hetiang a khawvawt leh kawng thui pawh sawi lova mahni hrehawm pawh pawisa lova an awmna chhan hi an biak Buddha hian mal a sawm an beisei vang a ni. An sum leh pai tam tak tak puithiamte an pe a, malsawmna dawn an beisei vang ani. Buddhist sakhua hi “in bazaar tawn” (trading religion) sakhua ti ila kan tisual tam lovang. Ngaihtuahna a ti kal thui hle a, tlawn ngai lo Pathian ka nei a ni tih min hriatnawn tir in ka hria a, min hmangaih avangin ka tan a thi a, thihna hnehin a tho leh a, hei hi ka tan a tawk a ni tih ka hriat avangin ka chhanglet ve a, chuta tang chuan a hausak renrual loh min chentirtu Pathian ka nei hi ka lawm hle.

Natna tihbaiawm khawih phalin
October thla tantir khan ka nu damdawiinah an dah thu min rawn hrilh a, June ni 30 a ka pa nen an accident avanga an enkawlna damdawi a ei a huat vangin a taksaah nasa takin harsatna a thlen a. A ka chhungte a pan a, a sam te a tlakawlh a, a nunna atan pawh hlauhthawn awm hial khawp a na in damdawi inah dah luh a ni a. Hetia rilru hrehawm taka kan chhungkua kan buai lai hian ka pa chu Lymphoma (Be cancer) a nei a ni tih doctor ten an hmu chhuak tih ka nauvin min rawn hrilh a. Ka nu damlohna avanga rilru nuam lo taka awm lai a ka pa cancer thu kan hriat meuh chuan sawi tur reng reng hi ka hre lova. Ka ngawi tawp mai a ni!! Suangtuahna thui tak a kal a, ka rilru a zawhna lo lut hmasa ber chu “Lalpa engatinge?” tih hi a ni. A chhanna ka nei lo tih ka hria a, harsa ti tak chung leh rilru na tak chungin Pathian phal loh leh hriatloh kan chungah thil a thleng ngai lo a ni tih chu pawm turin ka infuih tang tang a, kan chhungkua pawh kan infuih tawn nasa hle.

Hetia rilru a phurh nei ru reng chung hian Pathian chakna ringin ka nitin nun ka hmang chho ve zel a. A chang chuan ka dinhmun harsa ka ti lutuk te hi Kristiana Vanram kawngzawh a lungaihna chirhdup a a tla ang te khan ka inngai a, zawi te te hian ka pil riai riai in ka hria a, “Lalpa min khai chhuak rawh” tiin Pathian ka au mawlh mawlh reng thin. Hetia chau tak chung hian Pathian khawngaihna zarah ka hna thulh lovin, ka Chinese zirte, ka Free-talk te, ka naute ka hmuh thin te leh ka thian kawm te thulh lovin ka kal ve tek tek thin a. Chak loh chung chunga ka ti chung pawhin Pathian min hruaina leh awmpuina hi ka dawnna hi ka hmu fo thin. Mi tamtakin kan chhungkaw dinhmun min hriatpui a tawngtaina hi van lamah a chho mur mur mai a ni tih pawh ka hria a, min tawngtaipuitute avang hian nasa takin tih chakin ka awm ni ngeiin ka hria.

Passport Siamthar tirin Beijingah
Kum nga chuang Chaina ramah ka awm chhungin an ram khawpui ber Beijing kal lovin ka awm a, mahse ka passport a thih dawn avangin siamthar tir a ngaih zarah tulna avangin November ni 6 ah Xi’an chhuahsanin ah Beijing ka han tleng ve a. Ni 9 zanah ka awmna Xi’an lamah ka haw leh a. Ka cham chhungin ka thiannu Grace in a inah phal takin min thleng tir a, chu mai pawh ni lovin ka hna ber passport ka siamtirna tur a ka kal dan tur te ka bazaar dan tur te min lo ziah chhuah sak vek a harsatna leh buaina nei lovin mahni khua ang mai a han khawsa theiin min siam a ka lawm hle.

Ka passport form te ka thehlut a, vanneih thlak takin Passport Officer kha Shillong Don Bosco a zir chhuak a lo ni leh zel a. North east mi ka nih avangin ka lakah a lo tha em em leh zel a. Pathian min hruaina a ropui ka ti. Beijing kal remchangah tiin Temple of Heaven te, Tian ‘an men Square te, Forbidden City te, Great Wall te, Olympic Village te ka han tlawh ve a vannei ka in ti hle.

Cultural Dinner vawi li na

He university a ka thawh kum hnihna atang khan ka thawhna University a thawkve foreign teachers ho ten kan inhmelhriatna tha tak ni a hria in Cultural Dinner ka inah ka huaihawt thin a. November ni 28 khan ka inah ram dang atang local zirtirtu ten mahni ram ei siam theuh keng khawmin chaw kan ei khawm a nuam kan ti thlang hle.

Ka chanchin rawn tarlan hi a rei deuh tawh a chhiartute hriatthiamna ka han dil e. Ka sawi tawh ang khan ka nun a chauh em a vangin ka rawn thawn chhuak thei ngang lo a ni e. Ka theih angin ka rawn ziah chhunzawm zel ang.